ក្រុមហ៊ុន Visa ពង្រីកវិសាលភាពការទូទាត់ជាមួយកាត នៅផ្សារម៉ាក្រូ ក្នុងទីក្រុងភ្នំពេញ និងខេត្តសៀមរាប ដើម្បីបង្កើនជម្រើសទូទាត់តាមរយៈប្រព័ន្ធឌីជីថល

07/02/2025

ឥឡូវនេះ គ្រប់សាខាផ្សារម៉ាក្រូ ទាំងក្នុងទីក្រុងភ្នំពេញ និងខេត្តសៀមរាបចាប់ផ្តើមទទួលយកកាតទូទាត់ជាមួយ Visa កាត ដែលនេះផ្តល់នូវជម្រើសទូទាត់កាន់តែងាយស្រួលមួយទៀត សម្រាប់ប្រជាជនកម្ពុជា និងភ្ញៀវទេសចរ។
គំនិតផ្តួចផ្តើមនេះ គឺជាការគាំទ្រកំណើននៃការទូទាត់តាមរយៈប្រព័ន្ធឌីជីថលនៅកម្ពុជា និងជំរុញបរិយាបន្នហិរញ្ញវត្ថុ ដោយផ្តល់នូវដំណោះស្រាយការទូទាត់ចម្រុះដល់អ្នកប្រើប្រាស់ទាំងអស់ ស្របនឹងចក្ខុវិស័យថ្នាក់ជាតិ ក្នុងការតភ្ជាប់សេដ្ឋកិច្ចឌីជីថល ។

ក្រុមហ៊ុន Visa (NYSE: V) ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមរយៈប្រព័ន្ធឌីជីថលឈានមុខគេ បានប្រកាសពីការពង្រីកសេវាកម្មទទួលការទូទាត់ជាមួយ Visa កាត នៅគ្រប់ផ្សារ ម៉ាក្រូ ទាំងក្នុងរាជធានីភ្នំពេញ និងខេត្តសៀមរាប។ ការអភិវឌ្ឍន៍ដ៏សំខាន់នេះ នឹងជួយពង្រឹងប្រព័ន្ធអេកូឡូស៊ីទូទាត់តាមរយៈឌីជីថលនៅក្នុងប្រទេសកម្ពុជា ដោយផ្តល់ជម្រើសទូទាត់កាន់តែងាយស្រួល សម្រាប់អ្នកប្រើប្រាស់ និង ភ្ញៀវទេសចរ។

ខណៈពេលដែលការលក់ទំនិញនៅតាមផ្សារ តាមតូបលក្ខណៈគ្រួសារនៅតាមដងផ្លូវ នៅតែជាផ្នែកដ៏សំខាន់មួយ សម្រាប់ជីវិតប្រចាំថ្ងៃ អ្នករស់នៅក្នុងទីក្រុងក៏មានជម្រើសក្នុងការទិញទំនិញនៅក្នុងផ្សារទំនើបខ្នាតតូច ហាងលក់ទំនិញ និងហាងលក់គ្រឿងទេសផងដែរ។ កន្លែងថ្មីៗទាំងនេះផ្ទុកទៅដោយទំនិញប្លែកៗ និងមានលក់ទំនិញនាំចូលជាច្រើនប្រភេទ ដែលជារឿយៗពិបាករកនៅក្នុងតាមហាងតូចៗ និងផ្សារធម្មតា¹ ។ ការជំរុញឲ្យមានការទទួលយកការទូទាត់តាមរយៈ Visa កាតនេះ បានធ្វើឲ្យបទពិសោធន៍នៃការទិញទំនិញនៅផ្សារម៉ាក្រូ កាន់តែប្រសើរឡើង។ ផ្សារម៉ាក្រូសាខាភ្នំពេញ មានទីតាំងនៅចំកណ្តាលទីក្រុង ខណៈដែលសាខានៅខេត្តសៀមរាប មានទីតាំងនៅជិតតំបន់ទេសចរណ៍សំខាន់ៗ។

គំនិតផ្តួចផ្តើមនេះ មិនត្រឹមតែផ្តល់ប្រយោជន៍ដល់អ្នកប្រើប្រាស់ក្នុងស្រុកប៉ុណ្ណោះទេ ប៉ុន្តែថែមទាំងអនុញ្ញាតឲ្យទេសចរដែលអញ្ជើញមកទស្សនាប្រទេសកម្ពុជា អាចទិញទំនិញ និងប្រើប្រាស់មធ្យោបាយទូទាត់ផ្សេងៗ។ នេះជាការចូលរួមចំណែកដល់ការអភិវឌ្ឍន៍វិស័យទេសចរណ៍ ដែលជាកត្តាសំខាន់សម្រាប់ការអភិវឌ្ឍសេដ្ឋកិច្ចរបស់ប្រទេស។

អ្នកស្រី លីហ្សា សាជិន (Lisa Sargent) នាយិកាគ្រប់គ្រង Visa ប្រចាំប្រទេសកម្ពុជា បានមានប្រសាសន៍ថា៖ “ស្របតាមចក្ខុវិស័យរបស់រាជរដ្ឋាភិបាលកម្ពុជាសម្រាប់សេដ្ឋកិច្ចដែលតភ្ជាប់គ្នាដោយប្រព័័ន្ធឌីជីថល ក្រុមហ៊ុន Visa ប្តេជ្ញាជំរុញការទទួលយកទូទាត់តាមរយៈកាតនៅទូទាំងប្រទេស។ គំនិតផ្តួចផ្តើមនេះបញ្ជាក់ពីការយកចិត្តទុកដាក់របស់យើង ក្នុងការលើកស្ទួយជីវិតប្រជាជនកម្ពុជា ដោយផ្តល់ជូននូវជម្រើសទូទាត់ដ៏សម្បូរបែប និងងាយស្រួល និងជំរុញបរិយាបន្នហិរញ្ញវត្ថុ សម្រាប់មនុស្សគ្រប់គ្នា។ កិច្ចសហការរបស់យើងជាមួយ ផ្សារម៉ាក្រូ គឺជាសក្ខីភាពមួយចំពោះការប្តេជ្ញាចិត្តរបស់យើងក្នុងការជំរុញកំណើនទេសចរ និងរួមចំណែកដល់ប្រព័ន្ធអេកូឡូស៊ីហិរញ្ញវត្ថុ ឲ្យកាន់តែរីកចម្រើន និងប្រកបដោយបរិយាបន្នសម្រាប់ទាំងអស់គ្នា។”

អ្នកស្រី អាណាតា ថាឡាងឌី ជានាយកគ្រប់គ្រងនៃ ក្រុមហ៊ុន ម៉ាក្រូ កម្ពុជាបានមានប្រសាសន៍ថា៖ "យើងមានសេចក្តីរំភើបរីករាយក្នុងការសហការជាមួយក្រុមហ៊ុន Visa ដើម្បីពង្រីកជម្រើសទូទាត់ឌីជីថលសម្រាប់អតិថិជនរបស់យើង។ កិច្ចសហការនេះ គឺជាជំហានដ៏សំខាន់មួយឆ្ពោះទៅរកការផ្តល់នូវបទពិសោធន៍ទិញទំនិញដោយភាពរលូន និងស្របតាមការប្តេជ្ញាចិត្តរបស់យើងក្នុងការផ្តល់នូវភាពងាយស្រួល និងជម្រើសនៃការទូទាត់កាន់តែច្រើនដល់អតិថិជន។ តាមរយៈការទទួលយកការទូទាត់តាមឌីជីថល យើងមិនត្រឹមតែបង្កើនបទពិសោធន៍នៃការទិញទំនិញប៉ុណ្ណោះទេ ប៉ុន្តែថែមទាំងជួយដល់ការអភិវឌ្ឍន៍នៃសេដ្ឋកិច្ចឌីជីថលរបស់កម្ពុជាផងដែរ”។

___________________________________
¹ យោងតាម “មគ្គុទេ្ទសក៍ពាណិជ្ជកម្មប្រចាំប្រទេសកម្ពុជា” ចេញផ្សាយដោយ រដ្ឋបាលពាណិជ្ជកម្មអន្តរជាតិរបស់សហរដ្ឋអាមេរិក។ (ព័ត៌មានចុងក្រោយនៅថ្ងៃទី ៩ ខែមិថុនា ឆ្នាំ២០២៥។ https://www.trade.gov/country-commercial-guides/cambodia-distribution-and-sales-channels

អំពីក្រុមហ៊ុន Visa
ក្រុមហ៊ុន Visa គឺជាក្រុមហ៊ុននាំមុខគេក្នុងបច្ចេកវិទ្យាទូទាត់សាច់ប្រាក់តាមរយៈឌីជីថល ដែលជួយសម្រួលដល់ប្រតិបត្តិការរវាងអ្នកប្រើប្រាស់ ពាណិជ្ជករ ស្ថាប័នហិរញ្ញវត្ថុ និងស្ថាប័នរដ្ឋាភិបាលដែលពាក់ព័ន្ធ ច្រើនជាង ២០០ ប្រទេស និង តំបន់ ជារៀងរាល់ឆ្នាំ។ បេសកកម្មរបស់យើងគឺផ្សាភ្ជាប់ពិភពលោកទាំងមូល តាមរយៈការតភ្ជាប់បណ្តាញទូទាត់ប្រាក់ប្រកបដោយភាពច្នៃប្រឌិតថ្មី ងាយស្រួល អាចទុកចិត្តបាន និងមានសុវត្ថិភាពបំផុត ដែលអនុញ្ញាតឲ្យអ្នកប្រើប្រាស់ អាជីវករ និងសេដ្ឋកិច្ចមានការរីកចម្រើន។ យើងជឿជាក់ថាសេដ្ឋកិច្ចដែលរួមបញ្ចូលមនុស្សគ្រប់រូប នៅគ្រប់តំបន់ នឹងជួយដល់ការអភិវឌ្ឍនៅគ្រប់ទីកន្លែង ហើយយើងមើលឃើញថា នេះគឺជាមូលដ្ឋានគ្រឹះនៃចរន្តសាច់ប្រាក់។ ស្វែងយល់បន្ថែមតាមរយៈ Visa.com ៕